गजल : तिमीले …….हो

साँच्चै भन्नुपर्दा ढाँट्न,

तिमीले नै सिकाको हो

गाऊँगाऊँ गइ कुरा काट्न,

तिमीले नै सिकाको हो

फलको आशा विना कर्म, गर्ने गर्थें सँधै म चैँ

मह काढ्दा हात चाट्न, तिमीले नै सिकाको हो

मौका छोप्नु, फाइदा लुट्नु, मेरा लागि निन्दायोग्य

मालसंग कु-माल साट्न, तिमीले नै सिकाको हो

साथीसँगी, नातागोता केलाइकुलाइ समेट्थें म

एक्लो हुन, बाझ्न – फाट्न, तिमीले नै सिकाको हो

‘अन्जान’ थिएँ र त झुटो बोल्न – गर्न जान्दिन थें

उल्टोसुल्टो कुरा बाट्न, तिमीले नै सिकाको हो

– पृथ्वीनगर -८, प्रतिभा चौक, झापा हाल अमेरिका