काठमाडौँ – पछिल्लो समय सामाजिक सञ्जालमा बढ्दै गएको अमर्यादित र आपत्तिजनक टिप्पणीविरुद्ध गायिका एलिना चौहानले साइबर ब्युरोको ढोका ढक्ढक्याएकी छन्।
उनले आफ्नो फेसबुक पेजमा असभ्य र आपत्तिजनक कमेन्ट गर्ने व्यक्तिहरूविरुद्ध सोमबार प्रहरीको साइबर ब्युरोमा औपचारिक निवेदन दिएकी हुन्।
साइबर ब्युरोका अनुसार, गायिका चौहानले आफ्नो फेसबुकमा अमर्यादित कमेन्ट गर्ने व्यक्तिहरूलाई कानुनी कारबाहीका लागि माग गर्दै निवेदन दिएकी हुन्।
यस निवेदनमा चारजना व्यक्तिहरूको नाम उल्लेख गरिएको छ, जसले चौहानको पोस्टमा आपत्तिजनक टिप्पणी गरेका थिए।
साइबर ब्युरोले निवेदन दर्ता भएसँगै यस विषयमा अनुसन्धान थालेको छ। ब्युरोले ती टिप्पणीकर्ताहरूले फेक एकाउन्टमार्फत कमेन्ट गरेका हुन् वा वास्तविक परिचयबाट भन्ने विषयमा गहिरो अनुसन्धान गरिरहेको जनाएको छ।
सामाजिक सञ्जालको दुरुपयोग गरी गरिने यस्ता अमर्यादित टिप्पणीहरूले व्यक्तिविशेषको मानहानि गर्नुका साथै साइबर अपराधको दायरामा आउने भएकाले प्रहरीले यसलाई गम्भीरतापूर्वक लिएको छ।
पछिल्लो समय नेपालमा सामाजिक सञ्जालको प्रयोग बढ्दै जाँदा ‘साइबर बुलिङ’ र व्यक्तिगत चरित्रहत्याका घटनाहरू पनि बढिरहेका छन्।
विशेषगरी सार्वजनिक व्यक्तित्वहरू, कलाकार, राजनीतिकर्मी र सामाजिक कार्यकर्ताहरू यस्ता आक्रमणका शिकार बन्ने गरेका छन्।
