विद्यार्थीको स्मरण शक्ति बढाउँदै झापाका अर्पण

विर्तामोड  ।  स्मरण विधामा गिनिज बुक अफ वर्ल्ड रेकर्ड्समा नाम लेखाउन सफल  झापा भद्रपुरका अर्पण शर्मा कट्टेल यति बेला विद्यार्थीहरुलाई स्मरण शक्ति बढाउने कला सिकाउनमा व्यस्त छन् ।

संसारकै सबैभन्दा तेज स्मरण शक्ति भएका नेपाली युवाका रुपमा परिचित अर्पणले पछिल्लाे समय विर्तामोडको नवोदय शिक्षा सदनका कक्षा ५ देखि ८ सम्मका डेढ सय विद्यार्थीलाई “७ दिवसीय स्मरण शक्ति अभिवृद्धि तालिम” दिएका छन् ।

सो कार्यक्रममा पत्रकारहरुले विद्यार्थीहरुको स्मरण परिक्षण पनि गरेका थिए जहाँ विद्यार्थीहरुलाई शब्दका क्रमहरु सजिलै याद भएको पाइएकाे थियाे । 

यसका साथै विद्यार्थीहरुलाई  कुनै महिनाको कुनै  गते कुन बार पर्छ भनेर सोद्धा ठ्याक्कै भन्न सकेका थिए ।

सदनका प्रिन्सिपल धर्मराज माझी आफ्ना बिद्यार्थीहरुको स्मरण शक्ति बढेको देखेर धेरै नै हर्षित भए । उनले भने “यस्तो फाइदाजनक तालिम सबै विद्यालयहरुले आयोजना गरेर लाभान्वित हुन सक्छन ।”

समापन कार्यक्रममा संचारकर्मीहरुका साथै अर्पणका पिता मोहन शर्मा कट्टेल, विद्यालयका शिक्षकहरू लगायत अतिथि थिए ।
शिक्षा क्षेत्रमा सुगा रटाइको साटो आफूले सिकाएको बिधि अपनाउने हो भने सम्पूर्ण शिक्षा प्रणालीमै आमुल परिवर्तन आउने विश्व कीर्तिमानी शर्माले बताए ।