झापाको बुद्धशान्तिमा सुमो र मोटरसाइकल ठोक्किँदा ८ जना घाइते

झापा- झापाको बुद्धशान्तिमा आइतबार साँझ भएको दुर्घटनामा ८ जना घाइते भएका छन्। बुद्धशान्ति-३, पेट्रोल पम्प नजिकै मेची राजमार्गमा इलामबाट चारआलीतर्फ आइरहेको मे. १ ज. १६६७ नम्बरको सुमो गाडी अनियन्त्रित भई सडकमा पल्टिँदा विपरीत दिशाबाट आइरहेको को. ४ प. ७८११ नम्बरको मोटरसाइकललाई ठक्कर दिएको थियो।

दुर्घटनामा सुमोमा सवार ५ जना र मोटरसाइकलमा सवार ३ जना घाइते भएका छन्।

घाइतेहरूको विवरण:

• सुमोमा सवार:
  • इलाम नगरपालिका-६ का ६० वर्षीय पदमलाल लिम्बू (बायाँ हातमा चोट)
  • इलाम नगरपालिका-५ का २४ वर्षीय रन्जित बराईली (बायाँ खुट्टामा चोट)
  • झापा कमल गाउँपालिका-३ की ४२ वर्षीया तुलसादेवी विश्वकर्मा (बायाँ हातमा चोट)
  • सोही ठाउँका २७ वर्षीय मनोज विश्वकर्मा (निधारमा चोट)
  • मेचीनगर नगरपालिका-१० का ५५ वर्षीय धनकुमार चौधरी (बायाँ हातमा चोट)
• मोटरसाइकलमा सवार:
  • चालक, बुद्धशान्ति गाउँपालिका-३ का ३१ वर्षीय सुवास काफ्ले (बायाँ हात, खुट्टा र पेटमा चोट)
  • उनकी श्रीमती २३ वर्षीया भीमकुमारी काफ्ले (बायाँ खुट्टा र घुँडामा चोट)
  • उनीहरूका ८ महिनाका छोरा राचन काफ्ले (सामान्य)

घाइते सबैको अवस्था सामान्य रहेको र बुधबारेस्थित भागिरथा न्यौपाने अस्पतालमा उपचार भइरहेको प्रहरीले जनाएको छ।

दुर्घटनापछि सुमो चालक फरार छन् र उनको खोजी भइरहेको छ। सुमो र मोटरसाइकल दुवैलाई इलाका प्रहरी कार्यालय बुधबारेले नियन्त्रणमा लिएको छ।